သင်ရိုးကျွတ်သင်ချင်သောစိတ်
- လူဖြစ်ခွင့်ရနေတဲ့ လက်ကျန်အချိန်လေးမှာ သိစရာရှိတာတွေထဲက သိကိုသိရမယ့် သိစရာတွေကို သိဖို့အတွက် ကိုယ်တိုင် လက်တွေ့သိကျင့် အားထုတ်ထားလို့ အပြည့်အစုံ ဖြေနိုင်မယ့်သူဆီကို ရောက်အောင်သွား၊ သိချင်တာတွေ အကုန်မေး၊ ဟုတ်ရဲ့လား၊ သေချာရဲ့လားဆိုတဲ့ မေးခွန်းတွေကို ထပ်ဆင့် ဆက်တိုက်မေး။ ဖြေတဲ့သူကလည်း “ငါပြောတာ မယုံနဲ့၊ ကိုယ်တိုင်ကိုယ်ကျ လက်တွေ့သိကျင့်ကြည့်” “ဒီကျင့်စဉ်ဟာ ဒုက္ခထဲက လွတ်မြောက်စေတဲ့ သင်ရိုးကျွတ် ကျင့်စဉ်တွေပဲ ဟေ့! ” လို့ အာမခံတဲ့ အဆင့်ထိ ရှာဖွေသင်ယူ လေ့ကျင့်ချင်တဲ့ စိတ်ပုံစံ။
သင့်မြတ်သောစိတ်
- အဖြစ်အပျက်တစ်ခုဟာ ဖြစ်သင့်ဖြစ်ထိုက်လို့သာ ဖြစ်တယ်လို့ စိတ်ကလက်ခံမိရင် သင့်လျော်တယ်၊ သင့်တင့် လျောက်ပတ်တယ်။ လိုက်လျောညီထွေ သင့်မြတ်တယ်လို့ ဖြစ်ပေါ်လာတဲ့စိတ်။
သောင်မတင်ရေမကျစိတ်
- တိကျခိုင်မာပြတ်သားတဲ့ ဆုံးဖြတ်ချက်ချလို့ မရသေးဘဲ မှားသွားမလားဆိုတဲ့ သံသယစိတ်နဲ့ တိုးလိုးတန်းလန်း ဖြစ်နေတဲ့ စိတ်။
သောင်းကျန်းသောစိတ်
- ခေါင်းစဉ်ထဲမှာ စိတ်အဓိပ္ပာယ် ပါဝင်နေပါတယ်။
သောင်းပြောင်းထွေလာစိတ်
- ဖဿစေတသိက်က တစ်ဆင့်၊ စိတ်ထဲကို တစ်ခုပြီးတစ်ခု အဆက်မပြတ် ၀င်လာနေတဲ့ အာရုံတွေကို အလျဉ်မီအောင် မတားဆီးနိုင်လို့ နာမည်ပေါင်းများစွာ ရောထွေးဖြစ်ပေါ်လာတဲ့ စိတ်မျိုးစုံ။
သစ္စာဖောက်သောစိတ်
- သစ္စာမရှိတဲ့၊ သစ္စာမဲ့တဲ့ ခေါင်းစဉ် တစ်ခုတည်းအောက်က စိတ်များ။
သစ္စာရှိသောစိတ်
- သစ္စာတည်တဲ့၊ သစ္စာထားတဲ့ ခေါင်းစဉ် တစ်ခုတည်းအောက်က စိတ်များ။
သစ်စိမ်းချိုး ချိုးသောစိတ်
- သစ်ကိုင်းက ခြောက်နေလို့ ချိုးလိုက်ရင် ကျိုးသွားတာဟာ မူရင်းသစ်ပင်ကို အန္တရာယ်မဖြစ်စေရဘူး။ သစ်ကိုင်းအစိမ်းကို ချိုးတာ၊ မူရင်းသစ်ပင်ကို ရက်စက်ရာကျတယ်။ ထပ်ဆင့်ပွား ထွက်လာမယ့် အကိုင်းသစ်၊ အရွက်သစ်၊ အပွင့်သစ်၊ အသီးသစ်တွေကိုပါ ဖြတ်တောက် ဖျက်ဆီးရာ ရောက်တယ်။ မိမိအပေါ်မှာ ကျေးဇူးတရား ရှိနေတဲ့သူ၊ အရိပ်ပေးပြီး ခိုလှုံခွင့်ပေးသူအပေါ်မှာ ကျေးဇူးမသိတတ်တဲ့ စိတ်မျိုး။
သစ်လွင်နေသောစိတ်
- တိုးတက်အောင်မြင်မှုတွေဖြစ်မှာ သေချာနေတဲ့ ဘ၀အသစ်တစ်ခုထဲကို ပထမဆုံး စတင်ဝင်ရောက်လာတဲ့နေ့မှာ ဖြစ်ပေါ်နေတတ်တဲ့ စိတ်အသစ်။ မှားယွင်းတဲ့ အယူအဆဟောင်းတွေကို ရာသက်ပန် စွန့်လွှတ်ပြီး သဘာဝ အမှန်တရားကို အမှန်အတိုင်း သိနေမှန်း မိမိကိုယ်မိမိ သတိထားမိတဲ့ အချိန်မှာ ဖြစ်ပေါ်နေတဲ့ စိတ်အသိအသစ်။
သည်းခံတတ်သောစိတ်
- ဖဿရဲ့ အထိအတွေ့အရှိန်ကို ဘာမှမဖြစ်သလို သည်းညည်းခံတဲ့စိတ်။ လက်တွေ့ အကောင်အထည်ဖော် ဆောင်ရွက်တဲ့နေရာ မှာတော့ အခက်အခဲရှိတဲ့ စိတ်အမျိုးအစားပဲ။ လူ့သဘာဝအရ ဒုက္ခဖြစ်တော့မယ့် အနေအထား။ ဒေါသထွက်တော့မယ့် အနေအထား။ စိတ်ဆင်းရဲစရာ ကြုံတွေ့လိုက်ရတဲ့ အနေအထားတွေမှာ ဖြစ်ပေါ်လာတော့မယ့် စိတ်ကို ဖြစ်ခွင့်မပေးဘဲ ထိန်းချုပ်ထားရတာဆိုတော့ ခက်တယ်။ ဒါပေမယ့် ထိန်းချုပ်နိုင်ရင်တော့ ဖြစ်ပေါ်လာတော့မယ့် ဒုက္ခစိတ်၊ ဒေါသစိတ်၊ မဖြစ်သင့်တဲ့ စိတ်အရှိန်တွေကို စောင့်ကြည့်သိမှတ်စရာ အာရုံအဖြစ် ပြောင်းရွှေ့နိုင်ရင် ဖြစ်ပေါ်လာသမျှ စိတ်တွေအားလုံးဟာ ဖြစ်ပြီးတာနဲ့ ချက်ချင်းပျက်နေတဲ့ သဘာဝကို သဘောပေါက်နားလည်ပြီး ကြိတ်မှိတ်သည်းခံရတဲ့ အခက်အခဲကနေလည်း လွတ်မြောက်နေတာကို သိလိမ့်မယ်။