- တွေးခေါ်မြော်မြင်စိတ်
-
- အကြားအမြင် ဗဟုသုတရှိရမယ်။ စာပေပေါင်းစုံကို ဖတ်ရမယ်။ ဘယ်သူက ဘာပဲပြောပြော ချက်ချင်းမယုံရဘူး။ မိမိ အသိဉာဏ်နဲ့ မိမိ လွတ်လွတ်လပ်လပ် တွေးတောပြီး လက်တွေ့အကောင်အထည် ဖော်ကြည့်ရမယ်။ ရရှိတဲ့ ကိုယ်တွေ့ အသိဉာဏ်တွေကို ကြောင်းကျိုးဆီလျော်မှု ရှိ၊ မရှိ။ ဖြစ်နိုင်ချေ ရှိ၊ မရှိ။ မှားတယ်၊ မှန်တယ် စတာတွေကို စဉ်းစား သုံးသပ်နိုင်ရမယ်။ အပြန်ပြန် အလှန်လှန် ဘက်ပေါင်းစုံကနေ တွေးခေါ်မြော်မြင်တဲ့ စိတ်အမျိုးအစား။ ဒီစိတ်အမျိုးအစားကို တစ်ခါမှ မကြားခဲ့ဖူး၊ မသိခဲ့ဖူး၊ အသုံးမချခဲ့ဖူးလို့ အမှန်တကယ် အသုံးချရမယ့် အခွင့်အရေးနဲ့ ကြုံလာတဲ့အခါမှာ လွတ်လပ်စွာ တွေးခေါ် မြော်မြင်ရမယ်ဆိုတဲ့အချက်ကို အသုံးမချတတ်လို့ အခွင့်အရေး တစ်ခု ဆုံးရှုံးသွားတဲ့ လူငယ် တစ်ယောက်အကြောင်းကို ဖော်ပြလိုပါတယ်။
- အတွေးအခေါ်ကို ဦးစားပေးပြီး မိနစ် ၂၀ - ၃၀ စာ ဇာတ်လမ်းတစ်ခု တင်ပြတဲ့ပွဲ။ လွတ်လပ်တဲ့ အတွေးအခေါ်ကို ထုတ်ပြရမယ့် ပြိုင်ပွဲတစ်ခု။ အတွေးအခေါ် အမြော်အမြင်ကို ဦးစားပေး ဖော်ပြရမှာ။ လွတ်လပ်မှု ပေါ်လွင်အောင် ဦးစားပေး ဖော်ပြရမယ်ဆိုတဲ့ စိန်ခေါ်မှု။ လွတ်လပ်တဲ့ တွေးခေါ်မြော်မြင်ရမယ်ဆိုတဲ့ သတ်မှတ်ချက်ဟာ ပြိုင်ပွဲဝင်ချင်တဲ့ လူငယ်တစ်ယောက်အတွက် အခက်အခဲ ဖြစ်သွားစေတဲ့ အကြောင်းပါပဲ။ လူငယ်ရဲ့ ဘ၀မှာ လွတ်လပ်ခြင်းဆိုတဲ့ အဓိပ္ပာယ်ကို လုံးဝမသိဘူး ဖြစ်နေတယ်။ သူ့ဘ၀မှာ လွတ်လပ်မှု ဆိုတာမျိုးကို တစ်ခါမှ အသုံးမချဖူးဘူး။ အတွေးတွေးတဲ့နေရာမှာလည်း လွတ်လွတ်လပ်လပ် တွေးခွင့်မရခဲ့ဖူးဘူး။ ဆိုတော့ ထုတ်ပြန်ထားတဲ့ သတ်မှတ်ချက်နဲ့အညီ လွတ်လပ်တဲ့ တွေးခေါ်မြော်မြင်မှုကို ဦးစားပေးပြီး ဖော်ပြရမယ်ဆိုတာကို သူမလုပ်တတ်ဘူး ဖြစ်နေတယ်။ လွတ်လပ်စွာ တွေးခေါ်မြော်မြင်မှုဆိုတဲ့ စိတ်အရည်အချင်းတွေ သူ့ဆီမှာ ရှိလာအောင် ဘယ်သူ့ဆီမှာ သင်ရင်တတ်မှာလဲ? တဲ့။
- တွေးဆ တွက်ချက်စိတ်
- - ဘာအလုပ်ပဲလုပ်လုပ် ချက်ချင်းမလုပ်ဘဲ မလုပ်ခင် ချိန်ဆတယ်။ ဖြစ်နိုင်ချေ ရှိ၊ မရှိ တွေးတော စဉ်းစားတယ်။ မိမိအတွက်၊ သူတစ်ပါးအတွက် အကျိုးရှိ၊ မရှိ၊ လုပ်သင့်၊ မလုပ်သင့် တွက်ချက်တယ်။ ရရှိလာမယ့် ကောင်းကျိုးနဲ့ ဆိုးကျိုးမှာ ဘယ်ဘက်က ပိုများမလဲဆိုတာ တွက်ဆတယ်။ ဘက်ပေါင်းစုံကနေ တွေးဆ၊ တွေးတော စဉ်းစား၊ တွက်ချက် တွက်ဆတဲ့ စိတ်အမျိုးအစား။
- တွက်ကတ်စိတ်
- - သူလုပ်ရမယ့် အလုပ်ကို ငါလုပ်စရာမလိုဘူး။ ငါ့အလုပ်က ပြီးပြီ။ သူများကို ကူညီစရာမလိုဘူး။ သူ့အလုပ်က ငါနဲ့မဆိုင်ဘူး။ စသဖြင့် တစ်ဘက်သားကို အကူအညီပေးချင်တဲ့ စိတ်မရှိဘဲ မိမိတစ်ဘက်တည်းအတွက်သာ ကြည့်တတ်တဲ့ စိတ်အမျိုးအစား။
- တွန့်ဆုတ်စိတ်
- - မိမိတာဝန်ယူပြီး လုပ်ရမယ့်အလုပ်ကို မလုပ်သေးဘဲ လုပ်ရကောင်းမလား၊ မလုပ်ဘဲ ခဏနားရင်ကောင်းမလား၊ မှားသွားရင် ဘယ်လိုလုပ်မလဲ၊ နားလည်တတ်ကျွမ်းတဲ့လူနဲ့ တိုင်ပင်ပြီးမှ လုပ်ရင်ကောင်းမလား စတဲ့ မိမိကိုယ် မိမိအားမကိုးနိုင်ဘဲ မပြတ်မသား ဖြစ်နေတဲ့ စိတ်အမျိုးအစား။
- တွန့်တိုစိတ်
- - ကပ်စေးနှဲတဲ့ အဓိပ္ပာယ်ထက် ပိုနေတဲ့ စိတ်အမျိုးအစား။ ပေးကိုပေးရမယ့်အရာကို သူတစ်ပါး မရစေချင်တဲ့စိတ်မျိုးနဲ့ မပေးချင် သလိုလို ဖြစ်နေတဲ့ စိတ်အမျိုးအစား။
- တွန်းအားပေးစိတ်
- - လုပ်ကိုလုပ်ရမယ့် အလုပ်တစ်ခုကို စတင်လုပ်တော့မယ်လို့ ဆုံးဖြတ်လိုက်တဲ့အချိန်မှာ လှုံ့ဆော်တိုက်တွန်းတဲ့ စိတ်စေတသိက်က လုပ်ဖြစ်အောင် တွန်းအားပေးတယ်။ ဆက်တိုက်လုပ်ဖြစ်အောင် တွန်းထိုးပေးတယ်။ လုပ်ချင်တဲ့စိတ်တွေ အားလျော့မသွားအောင် တွန်းကန်ပေးတယ်။ မလုပ်ချင်သလိုလို စိတ်တွေဝင်မလာအောင် ဖယ်ရှားတွန်းလှန်ပေးတဲ့ စိတ်အဆင့်။
- တွယ်ကပ်သောစိတ်
- - မိမိကြိုက်နှစ်သက်ရာ တစ်စုံတစ်ခုကို ကပ်ငြိတပ်မက်ပြီး မခွဲနိုင် မခွာနိုင်၊ မစွန့်လွှတ်နိုင်ဘဲ တွယ်တာနေတဲ့ စိတ်အမျိုးအစား။