ထွက်ပေါက်ပိတ်သောစိတ်
- စိတ်ထဲကို ၀င်လာသမျှ စိတ်ပေါင်းစုံကို လက်ခံပြီး ခံစားတယ်။ ခံစားမှုတစ်ခုရဲ့ အရှိန်မကုန်ခင် နောက်ထပ်ဝင်လာတဲ့ အာရုံနဲ့ပတ်သက်တဲ့ ခံစားမှုကို ထပ်ပြီး ခံစားပြန်တယ်။ ခံစားမှုတစ်ခုရဲ့ အရှိန်မကုန်ခင် နောက်ထပ် နောက်ထပ် အဆက်မပြတ် ၀င်လာတဲ့ စိတ်တွေရဲ့ တစ်ခုပြီးတစ်ခုရဲ့ ခံစားမှုမျိုးစုံဟာ ရောထွေးကုန်တယ်။ ခံစားမှုအရှိန်တွေကို လက်စမသတ်နိုင်တော့တဲ့ အချိန်မှာ ခံစားမှုပေါင်းစုံ စုပြုံ ကျပ်ညပ်ပြီး ထွက်ပေါက်မရှိတော့ဘူး။ (လွတ်မြောက်ချင်ရင် လက်ရှိထွက်ပေါက် ပိတ်နေတဲ့နေရာကနေ ရုတ်တရက် ထွက်လိုက်ပါ။ တစ်စုံတစ်ခုဆီကို အာရုံရွှေ့လိုက်ပါ။ အာရုံသစ်ကြောင့် မိမိစိတ်က ဘယ်လိုတုံ့ပြန်နေလဲ? အာရုံသစ်ဆီမှာ မိမိစိတ်ရောက်နေလား? မိမိက ဘာကိုသိနေပြီလဲ?)
(မိမိအသိထားထားတဲ့နေရာမှာ မိမိအသိရှိနေရဲ့လား? စတဲ့ မိမိစိတ်ကို မိမိ ပြန်စစ်ဆေးတဲ့ အလုပ်သစ်တစ်ခု လုပ်ခိုင်းလိုက် ပါ။ မိမိစိတ်က အလုပ်သစ်တစ်ခုကို လုပ်ခွင့်ရသွားလို့ ရှိရင် ထွက်ပေါက်ထဲက လွတ်မြောက်ပြီးသား ဖြစ်နေပါလိမ့်မယ်။)
ထွင်းဖောက်သိသောစိတ်
- သိစရာမှန်သမျှအားလုံးကို ဆရာမပါ ကိုယ်တော်တိုင် ကိုယ်ပိုင်ဉာဏ်နဲ့ အကြွင်းအကျန်မရှိ အကုန်အစင် ထိုးထွင်း၍ ထွင်းဖောက် သိမြင်တော်မူတဲ့ ဂေါတမမြတ်စွာဘုရားရဲ့ စိတ်အသိဉာဏ် ပညာတော်။
ထွန့်ထွန့်လူးစိတ်
- လိုချင်တပ်မက်စိတ်အရှိန် ပြင်းထန်လွန်ကဲသွားရင်၊ ပျော်ရွှင်တက်ကြွမှုအရှိန် ပြင်းထန်လွန်ကဲသွားရင် ခန္ဓာကိုယ်တစ်ခုလုံး လှုပ်လှုပ်ရှားရှား ဖြစ်သွားတဲ့အထိ ဣနြေ္ဒပျက်စီးသွားတဲ့ စိတ်အနေအထား။
ထွန်းပေါက်သောစိတ်
- ထိုင်နေတဲ့သူဟာ ဘယ်နေရာကိုမှ မရောက်ဘူး။ ဘာမှမလုပ်တဲ့သူဟာ ဘာမှဖြစ်မှာ မဟုတ်ဘူး။ ထွန်းကားတယ်၊ ထူးချွန်တယ်၊ ထွန်းပေါက်တယ်ဆိုတာ အလုပ်လုပ်နေတဲ့သူတွေကို ဂုဏ်ပြုဖို့စောင့်နေတဲ့ စိတ်ဆုတံဆိပ်တွေပဲ။

Next Chapter »