ဇ အက္ခရာစဉ်ထဲမှာ ပါဝင်နေတဲ့ ဇကွဲ အက္ခရာခေါင်းစဉ်နဲ့ နာမည်များ

ဇယားချစိတ်

- မျှော်လင့်ထားတဲ့ အဖြေတစ်ခုကို အနီးစပ်ဆုံး လိုချင်ရင်တော့ ဘာပဲလုပ်လုပ် တိကျတဲ့ အစီအစဉ်တွေကို ကြိုတင်ပြင်ဆင် ရေးဆွဲပြီး ဆောင်ရွက်ရမယ့် စိတ်အနေအထား။

ဇယားရှုပ်စိတ်

- စာရင်းအတိအကျနဲ့ စီစဉ်ဆောင်ရွက်တာမျိုး မဟုတ်ဘဲ စိတ်ပါရင် တစ်မျိုး၊ မပါရင် တစ်မျိုး ကြုံသလိုလုပ်နေတော့ စာရင်းမရှိ၊ အင်းမရှိ၊ ရှုပ်ယှက်ခတ်နေတဲ့ ပရမ်းပတာစိတ်။

ဇာချဲ့စိတ်

- လိုအပ်တာထက် ပိုပြီး ချဲ့ထွင်လုပ်ဆောင်နေတဲ့ စိတ်။

ဇာတိမာန်စိတ်

- မိမိနိုင်ငံရေး၊ လူမျိုးရေးနဲ့ ပတ်သက်ပြီး မျိုးချစ်စိတ်၊ နိုင်ငံချစ်စိတ် ထက်သန်တက်ကြွနေတဲ့ စိတ်အဆင့်။

ဇိကုပ်နတ်ပြည်တင်စိတ်

- ကောင်းစားစေချင်လို့ အဆင်မြင့် အစီအစဉ် ဇယားတွေဆွဲပြီး စီစဉ်ပေးတာကို လက်မခံဘဲ အဆင့်နိမ့်ဇယားခွက်ထဲ ခုန်ချတဲ့ စိတ်အဆင့်။ (ဇိကုပ်ပြီး နတ်ပြည်တင်ပေးတာကို မြင့်တယ်ဆိုပြီး ဆင်းရဲတွင်းထဲ ခုန်ချတဲ့ မြန်မာစကားတစ်ခု။)

ဇီဇာကြောင်သောစိတ်

- အခုကြိုက်တယ်၊ ခဏနေရင်း မကြိုက်တော့ပြန်ဘူး။ နောက်တစ်မျိုး ကြိုက်ပြီးမှ ပထမဆုံးဟာကို ကြိုက်တော့မယ်ဆိုပြီး ဖြစ်ပြန်ရော။ သတိထိန်းချုပ်မှု မရှိဘဲ အမျိုးမျိုးဖြစ်နေတဲ့ စိတ်အလိုလိုက်မှု မြန်လွန်းနေတဲ့ စိတ်အနေအထား။

ဇောကပ်နေသောစိတ်

- အလုပ်တစ်ခုပြီးအောင် လုပ်မယ်ဆိုတဲ့ စိတ်နဲ့ အလုပ်မပြီးမချင်း ဘာကိုမှ စိတ်မ၀င်စားတော့ဘူး။ ဘယ်သူခေါ်လို့မှလည်း မထတော့ဘူး။ ထမင်းမေ့၊ ဟင်းမေ့ အလုပ်ထဲမှာ စွဲစွဲမြဲမြဲ ဖြစ်နေသော စိတ်အနေအထား။

ဇိုးခနဲဆတ်ခနဲစိတ်

- ကြိုတင်စီစဉ်ထားခြင်းမရှိဘဲ၊ ရုတ်တရက် အကြံပေါ်လာရင် ချက်ချင်း အကောင်အထည်ဖော် လုပ်ဆောင်လေ့ရှိတဲ့ စိတ်မြန်သူရဲ့ စိတ်အနေအထား။

ဇက်ရဲလက်ရဲစိတ်

- ပင်ကိုစရိုက်အရ ဘာမဆိုလုပ်ရဲကိုင်ရဲနေတဲ့ စိတ်အမျိုးအစား။

ဇောက်ချလုပ်သောစိတ်

- အလုပ်တစ်ခုကို အကောင်းဆုံးဖြစ်အောင် လုပ်တော့မယ်လို့ ဆုံးဖြတ်ပြီးတာနဲ့ အလုပ်ထဲမှာ အာရုံအကုန်နှစ်ပြီး လုပ်တဲ့ စိတ်အနေအထား။

ဇောက်ထိုးမိုးမျှော်စိတ်

- ဦးနှောက်နဲ့ တိုက်ရိုက်ဆက်နွယ်နေတဲ့ အာရုံကြောတွေ ရုတ်တရက် ထိခိုက်သွားရင် ဖြစ်ပျက်သွားတဲ့ စိတ်အနေအထား။

ဇောင်းပေးစိတ်

- မိမိလုပ်နေတဲ့အလုပ်ကိုပဲ ဦးစားပေးပြီး လုပ်မယ်ဆိုတဲ့ အသိဥာဏ်နဲ့ သတိထား တည့်မတ်ထားတဲ့ စိတ်အနေအထား။

ဇိမ်ကျသောစိတ်

- တစ်ခါမှ မရဘူးတဲ့ အခွင့်အရေးတွေ၊ တစ်ခါမှ မသုံးဆောင်ဖူးတဲ့ အသုံးအဆောင်တွေကို ရရှိပြီး စိတ်လွတ်ကိုယ်လွတ် ခံစားရင်း ကျေနပ်စွာ ဇိမ်ခံနေတဲ့ စိတ်အနေအထား။

ဇယ်စက်သလိုစိတ်

- နေ့စဉ်လုပ်နေကျ အလုပ်တွေကို မငြီးမငြူ၊ မနားမနေ အဆက်မပြတ် တစ်ခုပြီးတစ်ခု ဆက်တိုက် လှုပ်ရှား လုပ်ကိုင်နေတဲ့ အချိန်မှာ ဖြစ်ပေါ်ပေးနေတဲ့ စိတ်အနေအထား။

ဇွဲကောင်းသောစိတ်

- လုပ်ကိုလုပ်ရမယ့် အလုပ်ပေါ်မှာ ပင်ပန်းတယ်လို့ မယူဆဘဲ အလုပ်ပြီးသည်အထိ ဇွဲနပဲကြီးစွာ လုပ်ကိုင်နေတဲ့ စိတ်အနေအထား။

ဇွတ်တရွတ်နိုင်သောစိတ်

- မိမိဖြစ်ချင်မှု တစ်ခုတည်းကိုသာ တစ်ဖက်သတ် ဦးစားပေးပြီး ဆောင်ရွက်တတ်သော စိတ်အနေအထား။

ဇွတ်တိုးစိတ်

- ဖြစ်ချင်တာကို ဖြစ်အောင်လုပ်တဲ့နည်းကို အသုံးချပြီး ဖြစ်ချင်တာ ဖြစ်ဖို့အတွက် တစ်ခုတည်းအပေါ်မှာ အာရုံစူးစိုက်ပြီး ဖြစ်မှုထဲကို အမြန်ရောက်အောင် ကြိတ်မှိတ်သည်းခံ ဇွတ်တိုးဝင်နေတဲ့ စိတ်အနေအထား။

Next Chapter »