(၉) မနာလိုခြင်း ငြူစူခြင်းသဘော ဣဿာ စေတသိက်

အမြင်ကြောင့်၊ အကြားကြောင့်၊ အတွေးကြောင့်စတဲ့ အာရုံတွေက တစ်ဆင့်

သူတစ်ပါးရဲ့ ပညာတော်မှု၊ သူတစ်ပါးရဲ့လှပချောမောမှု၊ သူတစ်ပါးရဲ့ ပစ္စည်းဥစ္စာ ချမ်းသာပေါများမှု၊

သူတစ်ပါးရဲ့ အကျင့်စာရိတ္တကောင်းမှုတွေကို မမြင်ချင်တာ၊ နားမထောင်ချင်တာ၊ မစဉ်းစားချင်တာ ဣဿာ စေတသိက်။

မိမိထက်သာတယ်လို့ မိမိသဘောနဲ့မိမိ သတ်မှတ်ပြီး မြင်လိုက်ရတဲ့အချိန်၊ ကြားလိုက်ရတဲ့အချိန်၊

အတွေးထဲ ၀င်လာတဲ့အချိန်မှာ မနာလိုခြင်း၊ ငြူစူခြင်း၊ ကဲ့ရဲ့ရှုတ်ချခြင်း၊ မကျေနပ်ခြင်းတွေဖြစ်တာ ဣဿာ စေတသိက်။

ဒီစိတ်က အလုပ်တူတူ လုပ်နေတဲ့နေရာမှာ မိမိထက်သာသွားတဲ့သူအပေါ်မှာ ဖြစ်တဲ့စိတ်မျိုး။

ဣဿာစိတ်တွေ ဖြစ်ခွင့်ရသွားတာဟာ စိတ်ထဲကို ၀င်လာတုန်းက မသိလိုက်တာ တစ်ချက်ရယ်၊

ဝင်ဝင်ချင်း မဖြတ်တောက်နိုင်လိုက်တာ တစ်ချက်ရယ်ကြောင့် စိတ်အဆင့်ဆင့် ပြောင်းရွှေ့ပြီး နောက်ဆုံးမှာ

ဣဿာလို့ နာမည်တပ်ခံလိုက်ရတဲ့ စိတ်အဆင့် ရောက်သွားတာပဲ။

ဖြစ်သင့်တာက မြင်မြင်ချင်း၊ ကြားကြားချင်း၊ အတွေးထဲဝင်ဝင်လာချင်း၊ လက်မခံဘဲ ဖြတ်လိုက်ရမှာ။

မြန်မာမှာ စကားပုံရှိတယ်။

“ကိုယ့်ထက်သာရင် မနာလို၊

အကြံတူရင် ရန်သူ၊

အလုပ်တူရင် ငြူစူ”တဲ့။

ဒီစကားပုံကို ထားခဲ့တဲ့ ပုဂ္ဂိုလ်ကိုယ်တိုင် မနာလိုခြင်း၊ ငြူစူခြင်း၊ ရန်သူလိုသဘောထားခံရခြင်း ဒဏ်တွေ ဘယ်လောက်များများ ကြုံတွေ့လိုက်ရလဲ မသိဘူး။ ဘယ်လိုပဲဖြစ်ဖြစ် ရှေ့ကလူထားခဲ့တဲ့ သတိပေးတားမြစ်ချက်က မိမိအတွက် အကျိုးဖြစ်စေတယ်လို့ လက်ခံပြီး ကျေနပ်ရမှာပဲ။

ဆိုတော့ သူ့စေတနာကို ဂုဏ်ပြုလေးစားတဲ့အနေနဲ့

ကိုယ့်ထက်သာရင် မနာလိုတဲ့ စိတ်မျိုးအဖြစ်မခံဘဲ

ကျေနပ်တဲ့ စိတ်အဖြစ် ပြောင်းလိုက်ပါ။

အကြံတူရင် ရန်သူလို့ စိတ်ထဲမှာအရောက်မခံဘဲ

မိတ်ဆွေအဖြစ် စိတ်ကိုရွှေ့လိုက်ပါ။

အလုပ်တူရင် ငြူစူတဲ့ စိတ်သဘောမျိုးမထားဘဲ

ပူးပေါင်းပြီး အတူတူလုပ်မယ်လို့ စိတ်ကိုပြင်လိုက်ပါ။