(၃) သညာ
မှတ်သားခြင်းသဘောဟာ သညာစေတသိက်
အသိဉာဏ်နည်းပါးသူ၊ ဗဟုသုတနည်းပါးသူတွေမှာ အမှတ်သညာ မရှိခြင်းက ထင်ရှားစွာ ပေါ်လွင်နေတတ်တယ်။
မွေးခါစလူသားကို မိခင်၊ ဖခင်နဲ့ ပတ်ဝန်းကျင်က သင်ကြားပေးတာတွေ၊
မြင်တွေ့ကြားသိတာတွေကို မှတ်သားခဲ့သမျှ အာလုံးဟာ မှတ်သားခြင်း သညာပါပဲ။
သညာသိဆိုတာ ပညာသိလို၊ အမှန်ကိုသာ အမှန်အတိုင်း သိတာမျိုးမဟုတ်ဘူး။
အမှားကိုလည်း မှတ်သားပြီး သိနေတဲ့သဘောမျိုး ရှိသလို၊
အမှန်ကိုလည်း မှတ်သားပြီး သိတဲ့သဘောမျိုး ရှိနေတတ်တယ်။
ဒီနေရာမှာ ကြောက်စရာ အလွန်ကောင်းတဲ့ အန္တရာယ်အနေနဲ့ ဖော်ပြရရင်
လူသားတစ်ဦးရဲ့ မှတ်သိမှုစတဲ့အချိန်တည်းက
အမှားတစ်ခုကို အမှန်လို့ အမှတ်မှားခဲ့ရင်တော့
အဲဒီအမှတ်မှားနေတာကို မှန်အောင် ပြန်ပြီး ပြုပြင်တဲ့နေရာမှာ
အခက်အခဲတွေ အများကြီး ရှိနိုင်တယ်။
(ဘာဖြစ်လို့လဲဆိုတော့ သူမှတ်ထားတဲ့ အမှတ်မှားကြီးက အစွဲတစ်ခုလို ဖြစ်သွားလို့ပဲ။)
မိမိကိုယ်တိုင်က ဖြစ်စေ၊ အုပ်ထိန်းသူက ဖြစ်စေ
အမှန်နဲ့အမှားကို ခွဲခြားသိနေမှသာ
တခြားမှတ်သားနေသူကို အမှန်နဲ့အမှား ခွဲခြားသိအောင်
လက်ဆင့်ကမ်း ပေးဝေနိုင်မှာ။
ကောင်းတဲ့ကုသိုလ်ကိစ္စတွေကို ဆောင်ရွက်တဲ့နေရာမှာ မှန်တာကို မှတ်တဲ့သညာကို အသုံးပြုတယ်။
မကောင်းတဲ့အကုသိုလ်ကိစ္စတွေကို ဆောင်ရွက်တဲ့နေရာမှာတော့
မကောင်းတဲ့နည်းပညာကို မှတ်တဲ့သညာစိတ်ကို အမှတ်မှားစွာ အသုံးချတယ်။
ဥပမာ - ဖဲရိုက်တဲ့နေရာမှာ ဖဲလိမ်ရိုက်တဲ့နည်းကို မှတ်ထားပြီး အသုံးချတာ။
ဖောက်ထွင်းခိုးယူတဲ့နည်းကို မှတ်ထားတာတွေဟာ
မှားတဲ့ဘက်မှာ မှတ်သားမှု အားကောင်းနေတဲ့ သဘော
အသိဉာဏ်ပိုင်းမှာ သညာသိနဲ့ ကိုယ်တိုင်လက်တွေ့သိတဲ့ပညာသိရဲ့ တန်ဖိုးအားဖြင့် ကွာခြားနေတာတွေကိုတော့ ခွဲခြားပြီး သိဖို့လိုတယ်။