တုံးတိုက်တိုက် ကမ်းတိုက်တိုက်စိတ်
- မြတ်စွာဘုရားဟောကြားတော်မူခဲ့တဲ့ ဒုက္ခထဲက လွတ်မြောက်ကြောင်း ကျင့်စဉ်တွေကို ကျင့်စဉ် စည်းကမ်းနဲ့အညီ ကိုယ်တိုင် လက်တွေ့ကျင့်ကြံအားထုတ်တော့မယ်လို့ ဆုံးဖြတ်ချက်ချပြီးရင် ဘာကိုမှ စောဒကတက် ဆင်ခြေပေးတာတွေ မလုပ်တော့ဘဲ ဘယ်လို အနှောင့်အယှက်ပဲလာလာ လုံးဝနောက်မဆုတ်ဘဲ ဖြစ်တဲ့နည်းနဲ့ ဖြစ်အောင် အားထုတ်တဲ့ စိတ်အနေအထား။ (မိမိအတွက် လိုအပ်တဲ့ ပညာရပ် တစ်ခုခုကို အဲဒီစိတ်မျိုးနဲ့သာ ကြိုးစားအားထုတ်ပြီး ရအောင်ယူမယ်ဆိုရင် မရဘူးဆိုတဲ့ ရာခိုင်နှုန်းက အရမ်းနည်းသွားပြီ။)
တုံးတုံးချစိတ်
- စိတ်ကိုစောင့်ကြည့်သိမှတ်နေတဲ့ စိတ်လေ့ကျင့်ခန်းဟာ အားထုတ်ရင် အားထုတ်နိုင်သလောက် လက်ရှိ ပစ္စုပ္ပန်တည့်တည့်မှာပဲ မိမိစိတ်အသိရှိနေလို့ သတိစွမ်းအားတွေ ကောင်းလာစေပြီး ကြားဖြတ်စိတ်ရဲ့ ၀င်ရောက် တိုက်ခိုက်မှုကို လုံးဝခံရမှာ မဟုတ်တော့ဘူးလို့ ယုံကြည်စိတ်ချနေတဲ့ စိတ်အနေအထား။
တုံးပေကတ်သတ်စိတ်
- မထီမဲ့မြင်စိတ်၊ ပေကတ်ကတ်စိတ်ရှိသူတွေဟာ တော်ရုံတန်ရုံ အနေအထားမျိုးနဲ့ ပြောဆိုဆုံးမ စည်းရုံးလို့ မရနိုင်တဲ့ စိတ်အမျိုးအစား။
တွေဝေစိတ်
- စိတ်ကိုစောင့်ကြည့်သိမှတ်ပြီး စိတ်သဘာဝကို သိအောင်အားထုတ်တာမျိုး မဟုတ်ဘဲ စဉ်းစားတွေးတော၊ စူးစမ်း၊ ဆင်ခြင် သုံးသပ်တဲ့ဘက်ကို အာရုံပို့တာများသွားရင် သိမှတ်မှုကို အနှောင့်အယှက်ဖြစ်စေပြီး အခြားအာရုံဘက်ကို ပြောင်းရွှေ့သွားတဲ့ စိတ်အနေအထား။
တွေ့ထိစိတ်
- မျက်စိ၊ နား၊ နှာခေါင်း၊ လျှာ၊ ကိုယ်၊ စိတ် ပစ္စည်းခြောက်ခုရဲ့ အာရုံခြောက်ပါးကြောင့် မိမိစိတ်ထဲကို အာရုံအဖြစ် ၀င်လာပြီး အာရုံနဲ့ စိတ်နဲ့ စိတ်ချင်း ထိတွေ့တဲ့အခါမှာ သတိစွမ်းအားနဲ့ အသိစွမ်းအားကြောင့် သိလိုက်နိုင်တဲ့ ဖဿ စေတသိက်ရဲ့ တွေ့ထိစိတ်။
တွေ့ရှိစိတ်
- လူတွေဒုက္ခရောက်နေကြရတာ ခန္ဓာကိုယ်ရှိနေလို့ပဲ၊ စိတ်တွေရှိနေလို့ပဲ ဆိုတာကို သဘောပေါက်သွားတဲ့ စိတ်အနေအထား။