- ဖန်တီးစိတ်
- - အာရုံခြောက်ပါးကြောင့် ဖြစ်ပေါ်လာတဲ့ အာရုံတွေထဲက အာရုံတစ်ခုကို တွေးတောကြံစည်မှုကတစ်ဆင့် စိတ်ကူးအတိုင်း အကောင်အထည် ပေါ်အောင် ပြုလုပ်နေတဲ့ တီထွင်ဖန်တီးစိတ်။
- ဖမ်းချုပ်စိတ်
- - စိတ်အဖြစ်အပျက် အသွားအလာတွေထဲက ထကြွသောင်းကျန်းနေတာတွေ၊ ဖောက်ပြန်လွင့်မျောနေတာတွေ မရှိအောင် အသိနဲ့ သတိ စွမ်းအားနဲ့ ထိန်းချုပ်ထားတဲ့ စိတ်အနေအထား။
- ဖမ်းစားစိတ်
- - မိမိရဲ့အပြောအဆို၊ အပြုအမူ၊ လှုပ်ရှားမှု အနေအထား၊ ရုပ်ရည်အနေအထား၊ ၀တ်စားဆင်ယင် ထုံးဖွဲ့မှုအနေအထား၊ တင်ပြမှု ပညာပိုင်းဆိုင်ရာ စွမ်းရည်အစရှိတာတွေကို သူတစ်ပါးလူအများ စိတ်ဝင်စားအောင် ပြုလုပ်ပြီး ဆွဲဆောင်ဖမ်းစားတဲ့ စိတ်အနေအထား။
- ဖိမ့်ဖိမ့်တုန်စိတ်
- - မိမိကြောက်ခဲ့ရတဲ့သူရဲ့ ဆူပူအော်ဟစ် ကြိမ်းမောင်း ခြိမ်းခြောက်ခြင်းကို ခံစားရတဲ့အချိန်မှာ အစဉ်အလာ အတိုင်း ဖြစ်ပေါ်နေကျ ကြောက်စိတ်။
- ဖုံးကွယ်စိတ်
- - မသိတာကို သိတယ်ဆိုတဲ့စိတ်နဲ့ ဖုံးလွှမ်းပြီး သိချင်ယောင်ဆောင်နေတယ်။ ဟန်ဆောင်ထားတဲ့ စိတ်အတုရဲ့ ဖုံးအုပ်မှုအောက်မှာ ဘာမှမသိတဲ့ မသိခြင်းတွေပဲ ရှိနေတာကို မိမိကိုယ်တိုင် မသိဘူးဖြစ်နေတယ်။ အစစ်မဟုတ်တဲ့ အတုရဲ့ ဖုံးကွယ်မှုအောက်မှာ အစစ်ဆိုတာ မရှိနိုင်ဘူး။
- ဖယ်ထုတ်ထားသောစိတ်
- - မှားနေတဲ့ အယူအဆတွေကို ဖယ်ကြဉ်ပစ်ရမယ်။ မှားနေတဲ့ သဘောတရားတွေကို ဖယ်ခွာပစ်ရမယ်။ မှားနေတဲ့ အတွေးအခေါ်တွေကို ဖယ်ထုတ်ပစ်ရမယ်။ မှားနေတဲ့ ကြံစည်တွေးတော စဉ်းစားနေတာတွေကို ဖယ်ရှားပစ်ရမယ်။ မှားနေတဲ့ လမ်းစဉ်တွေကို ဖယ်ရှောင်ပစ်ရမယ်။ မှားနေတာတွေကို ဖယ်ထုတ်နေမှ အမှန်ဆိုတာကို လက်ခံလို့ရလာမှာ။ မှားနေတယ်ဆိုတာ သဘာဝရဲ့အမှန်တရားကို လက်မခံတာပဲ။ မှန်တယ်ဆိုတာ အမှန်အတိုင်း ရှိနေတဲ့ သဘာဝအရှိကို အရှိအတိုင်း လက်ခံတာ။
- ဖျိုးဖျိုးဖျတ်ဖျတ်စိတ်
- - ဖျတ်ဖျတ်လတ်လတ် တက်ကြွလန်းဆန်းနေတဲ့စိတ်။
- ဖျက်ဆီးစိတ်
- - မိမိစိတ်ကို ဖျက်လိုဖျက်ဆီးလုပ်နေတာ မိမိရဲ့စိတ်ပဲ။ သူတစ်ပါးကို ပျက်စီးအောင် ဖျက်ဆီးမယ်ဆိုတဲ့ စိတ်တစ်ခုပေါ်လာတဲ့ အချိန်ကစပြီး ဖျက်ဆီးမယ့် အစီအစဉ်ဆွဲနေရတာနဲ့ မိမိစိတ်က အရင် ဖျက်ဆီးခံလိုက်ရပြီ။
- ဖျောက်ဖျက်စိတ်
- - စိတ်ကို သန့်ရှင်းစင်ကြယ်အောင် တည်ဆောက်နေတဲ့အချိန်မှာ မှားယွင်းတဲ့ အယူအဆတွေ အကုန်လုံး ဖျောက်ဖျက်ပစ်ရမယ်။ စိတ်ကိုညစ်နွမ်းစေတဲ့ ခံစားမှုတွေအကုန်လုံး ဖျောက်ဖျက်ပစ်ရမယ်။ ဘ၀အသစ်တစ်ဖန် ပြန်ဖြစ်စေတဲ့ တဏှာစိတ် ဆာလောင်မှုတွေ အကုန်လုံး ဖျောက်ဖျက်ပစ်ရမယ်လို့ သိနေတဲ့ ဖျောက်ဖျက်စိတ်။
- ဖျောင်းဖျစိတ်
- - မိမိစိတ်အစဉ်ကို ဒုက္ခဖြစ်စေတာ မိမိတွေးနေတဲ့ အတွေးကြောင့်ပဲ။ ခံစားမှုစိတ်တွေဟာ လောင်စာပဲ။ လိုချင်တပ်မက်တဲ့ ဆာလောင်မှုတွေဟာ လောင်စာပဲ။ မီးဆိုတာ လောင်စာရှိလို့ လောင်တာ။ စိတ်ဆင်းရဲဒုက္ခရောက်တယ်ဆိုတာ လောင်စာဖြစ်တဲ့ခံစားမှုတွေ လိုချင်တပ်မက်မှုတွေကြောင့် ဒုက္ခမီးတွေ လောင်နေတာပဲ။ ခံစားမှုတွေ အကုန်ထုတ်လိုက်၊ လိုချင်တပ်မက်စိတ်တွေ အကုန်ထုတ်လိုက်၊ စိတ်ထဲမှာ ခံစားမှုတွေ လိုချင်တာတွေ ဘာမှမရှိမှ သက်သာမှာလို့ စိတ်သက်သာအောင် နှစ်သိမ့်ဖျောင်းဖျပေးနေတဲ့ စိတ်အနေအထား။
- ဖျတ်ခနဲစိတ်
- - ရုတ်တရက် ချက်ချင်း သတိရသွားတဲ့စိတ်။ ရုတ်တရက် ချက်ချင်း အကြံရတဲ့စိတ်။ ရုတ်တရက် ချက်ချင်း သဘောပေါက် နားလည်သွားတဲ့စိတ်။ ရုတ်တရက် ဖြစ်ပေါ်တဲ့ စိတ်အမျိုးအစား နာမည်တစ်ခု။
- ဖျတ်လတ်စိတ်
- - ဘာပဲလုပ်လုပ် တက်ကြွ ထက်သန် လန်းဆန်းသွက်လက်နေတဲ့စိတ်။