ပြုတ်ပြုတ်ပြုန်းစိတ်
- ဖြစ်ချင်တာတွေ ဖြစ်နေတတ်တဲ့ သဘာဝကို မိမိစိတ်တိုင်းကျ ပိုင်စိုးပိုင်နင်း ဇယားတွေဆွဲပြီး စီစဉ်ထားတာတွေ၊ မျှော်လင့်သလို ဖြစ်မလာတဲ့အခါမှာ အချိန်တော်တော်ကြာတဲ့အထိ နာလန်မထူနိုင်အောင် ပျက်စီးသွားတဲ့ စိတ်ပုံစံ။
ပြန့်ကျဲလွင့်မျောစိတ်
- ခေါင်းစဉ်ထဲမှာ စိတ်အဓိပ္ပာယ် ပါဝင်နေပါတယ်။
ပြန့်ပြန့်ရန့်ရန့်စိတ်
- ကျက်သရေမင်္ဂလာအပေါင်းနဲ့ ပြည့်စုံပြီး တည်ငြိမ်ခန့်ညားသိက္ခာရှိတဲ့ စိတ်အမျိုးအစား။
ပြိန်းဖျင်းစိတ်
- အဆင့်အတန်းနိမ့်တဲ့ အဆင့်ထက် အောက်ကို ထပ်နိမ့်ကျတဲ့ စိတ်အဆင့်။
ပြုန်းတီးစိတ်
- မိမိရဲ့အသိ သတိတွေ အသုံးမချဘဲ စွန့်ပစ်ထားတာ ကြာသွားရင် ရှိခဲ့ပြီးသား အသိဉာဏ်ပညာတွေပါ တဖြည်းဖြည်း လျော့ကျသွားနိုင်တယ်။ ဂရုတစိုက် ပြန်လည် ထိန်းသိမ်းပြုပြင်မှုတွေ မရှိဘူးဆိုရင်တော့ အသိ သတိတွေ လုံးဝပျောက်ကွယ် ပြုန်းတီးသွားနိုင်တဲ့ စိတ်အခြေအနေ။
ပြဿနာစိတ်
- ရုပ်နဲ့နာမ်ရဲ့သဘော၊ စိတ် စေတသိက်တွေရဲ့ သဘာဝတွေအရ အချိန်တိုင်းမှာ စိတ်ချင်း စိတ်ချင်း ပြဿနာတက်နေကြတာ။ မိမိစိတ်နဲ့ မိမိနဲ့ ပြဿနာတက်သလို၊ သူတစ်ပါးအာရုံခြောက်ပါးနဲ့ မိမိအာရုံ ခြောက်ပါးချင်းလည်း ပြဿနာတက်နေမှာပဲ။ မိမိရဲ့ ကာမဂုဏ်အာရုံတွေနဲ့ သူတစ်ပါးရဲ့ ကာမဂုဏ်အာရုံတွေနဲ့ ပြဿနာတက်နေကြမှာပဲ။ အာရုံခြောက်ပါးကြောင့် စိတ်ထဲဝင်လာတဲ့ စိတ်တစ်ခုစီမှာ ပြဿနာ တစ်ခုစီ ပါလာတယ်။ အဲဒီ ပြဿနာက ခံစားမှုပဲ။ ခံစားမှုတွေကြောင့်လည်း ပြဿနာတက်တဲ့ စိတ်တွေ တစ်ခုပြီးတစ်ခု ဖြစ်နေတာ။
ပွစာတက်စိတ်
- လာသမျှဧည့်သည်စိတ်တွေ အကုန်လုံးကို လက်ခံမိလို့ မိမိရဲ့စိတ်အိမ် အခန်းကျဉ်းလေးထဲမှာ ဧည့်သည်စိတ်တွေ ပြည့်ကျပ် ညပ်သပ်ပြီး ဧည့်သည်စိတ်က ပါလာတဲ့ စိတ်အမှိုက်တွေပါ ကြုံသလို လွှင့်ပစ်ခဲ့ကြလို့ မိမိရဲ့စိတ်အိမ်ထဲမှာ ပွစာတက်နေတဲ့ စိတ်အနေအထား။
ပွားများအားထုတ်စိတ်
- သိစရာရှိတာတွေ သိအောင်ရှာဖွေနေတဲ့ အသိဉာဏ်တွေ တစ်ဆင့်ပြီးတစ်ဆင့် တိုးတက်ပွားများလာအောင် လေ့ကျင့် တည်ဆောက်နေတဲ့ အသိ သတိစိတ်တွေ တစ်ဆင့်ပြီး တစ်ဆင့် အားထုတ်နေတဲ့ စိတ်အလုပ်။
ပွဲပြီးမီးသေစိတ်
- နားထောင်ချင်တဲ့ တရားစကားကို နားထောင်တဲ့အချိန်မှာပဲ စိတ်ဝင်စားသလို ဖြစ်ပေးပြီး တရားစကားလည်းဆုံးရော နားထောင်ခဲ့တာတွေ နားထောင်တဲ့နေရာမှာ ထားပစ်ခဲ့ပြီး ထပြန်လာတာ။ အိမ်လည်းရောက်ရော ဘာတရားအသိမှ ပါမလာတော့တဲ့စိတ်။
ပွက်ပွက်ဆူစိတ်
- စိတ်ခံစားမှုအရှိန် ဒီဂရီ အမြင့်ဆုံး ရောက်ရှိနေတဲ့စိတ်။
ပွက်လောရိုက်စိတ်
- စိတ်ရှုပ်ထွေးစရာ အကြောင်းအရာတွေ မိမိစိတ်ထဲမှာ စုပြုံထည့်ထားမိတော့ ရှုပ်ထွေးစိတ်တွေ တစ်ခုစီက အစွမ်းတွေ ထုတ်ပြကြလို့ ထိန်းမရ သိမ်းမရ ပွက်လောရိုက်ကုန်တဲ့ စိတ်အနေအထား။
ပွင့်လင်းစိတ်
- မိမိစိတ်ရဲ့ ရိုးသားမှုအပေါ်မှာ ယုံကြည်မှုရှိပြီး ပြောစရာရှိတာ၊ သတိပေးစရာရှိတာ၊ အကြံဉာဏ်ကောင်း ပေးစရာရှိတာတွေကို အပြုသဘောနဲ့ ထိန်ချန် သိမ်းဆည်းထားခြင်း မရှိဘဲ ပွင့်ပွင့်လင်းလင်း ဖော်ပြတဲ့စိတ်။
ပွတ်သီးပွတ်သပ်စိတ်
- ချစ်ခြင်းမေတ္တာဖြစ်တဲ့ စိတ်အပေါ်မှာ အခြေခံပြီး ရင်းနှီးမှုကို ဖော်ပြရင်း ပြုမူနေမိတဲ့ စိတ်လှုပ်ရှားမှု။
ပွန်းပဲ့စိတ်
- အကြောင်းအရာတစ်ခုခုကို မရည်ရွယ်ဘဲ ပြောဆိုမိခဲ့တဲ့ စကားတစ်ခွန်းကြောင့် ဒါမှမဟုတ် အပြုအမူတစ်ခုခုကြောင့် တစ်ဘက်သားရဲ့ စိတ်မှာ အနည်းငယ် ထိရှသွားစေတဲ့ စိတ်အနာ။
ပြွတ်သိပ်ရှုပ်ထွေးစိတ်
- လိမ်ညာတာတွေရော၊ ပွေလိမ်ရှုပ်ထွေးတာတွေရော၊ အကုန်လုံးစုပြုံသွားတဲ့အခါမှာ ရှင်းမရအောင် ပြည့်ကျပ်ညပ်သပ် ပွေလိမ်ရှုပ်ထွေးသွားတဲ့ စိတ်အရှုပ်။

Next Chapter »