- ထောက်လှမ်းစိတ်
- - သိစရာရှိတာတွေထဲက သိသင့်တာကို သိချင်လို့ စုံစမ်းနေတဲ့စိတ်။ မိမိစိတ်ထဲကို ၀င်လာတဲ့ အာရုံနဲ့စိတ်နဲ့ ထိတွေ့ပြီး ခံစားမှု တစ်ခု ဖြစ်တတ်တဲ့သဘောကို သိနေလို့ ကြားဖြတ်ဝင်လာမယ့်စိတ်ကို ထောက်လှမ်းရေးအသိနဲ့ စောင့်ကြည့်သိမှတ်နေတဲ့ စိတ်အနေအထား။
- ထိုက်ထိုက်တန်တန်စိတ်
- - လိုချင်တဲ့အရာရဲ့ အဆင့်၊ တန်ဖိုး ပမာဏ အတိုင်းအတာ ကြီးကျယ်ခမ်းနားမှုပေါ်မှာ မူတည်ပြီး မိမိဘက်က ရင်းနှီးမြှုပ်နှံ စိုက်ထုတ် ကြိုးစားပေးရမယ့် စိတ်အတိုင်းအတာကလည်း ညီတူညီမျှ ဖြစ်ပေးရမယ့် စိတ်အဆင့်။
- ထင်ပေါ်နေတဲ့စိတ်
- - လုပ်သင့်တဲ့အလုပ်ကို စနစ်တကျ ပီပီပြင်ပြင် အားကြိုးမာန်တက် လုပ်ဆောင်နေတဲ့သူရဲ့ လုပ်အားနဲ့ လုပ်ရပ်တွေဟာ လုပ်သင့်တာကို မလုပ်ဘဲ အချောင်ခိုနေတဲ့သူထက် အစစအရာရာသာပြီး ပေါ်လွင်ထင်ရှားနေတဲ့ စိတ်အရည်အချင်း။
- ထင်ယောင်ထင်မှားစိတ်
- - ခံစားမှုအပါအ၀င် စိတ်သဘောရဲ့ သဘာဝကိုက ခဏလေးပဲ ဖြစ်ခွင့်ရှိတာပါ။ တစ်ကြိမ်မှာ တစ်ခုပဲ ၀င်ခွင့်ရတဲ့ အာရုံနဲ့ စိတ်၊ စိတ်ချင်း ထိတွေ့တဲ့ အချိန်လေးမှာ မဖြတ်တောက်နိုင်လို့ ခံစားမှုကြာတယ်ဆိုပြီး ထင်မှတ်မှားနေတာပဲ ဖြစ်တယ်။ တစ်ခုပြီးမှ တစ်ခု ဖြစ်ခွင့်ရှိတဲ့ စိတ်ရဲ့သဘာဝကို သဘောမပေါက်လို့သာ ခံစားမှုတွေ တစ်ဆက်တည်း ဖြစ်နေတယ်ဆိုပြီး ထင်ယောင်ထင်မှား ဖြစ်နေတဲ့ စိတ်အနေအထား။ (ထင်ယောင်ထင်မှားနဲ့ ထင်မှတ်မှားဆိုတဲ့ စကားလုံး အဓိပ္ပာယ်ကိုက ထင်နေတာသာဖြစ်လို့ အတိအကျ မှန်တယ်လို့ အဖြေမထွက်ပါဘူး။)
- ထင်ရာစိုင်းစိတ်
- - စိတ်ရဲ့သဘာဝကိုက ထိန်းချုပ်မှုမရှိရင် ပျံ့လွင့်တတ်တဲ့သဘော ရှိတယ်။ စိတ်ထဲကို ၀င်လာသမျှ စိတ်တွေကို ထိန်းချုပ်မှု မရှိဘဲ လွှတ်ပေးထားရင်တော့ မြင်းဇောင်းထဲက ပြေးထွက်ချင်နေတဲ့ မြင်းတွေကို ဇောင်းထဲက လွှတ်ပေးလိုက်သလို၊ လှောင်အိမ်ထဲက ငှက်တွေကို လွှတ်ပေးလိုက်သလို သွားချင်ရာသွား၊ ရောက်ချင်တဲ့နေရာရောက်၊ လုပ်ချင်တာတွေလုပ်မိပြီး ဖြစ်ချင်ရာတွေ ဖြစ်ကုန်တဲ့အထိ အန္တရာယ်ရှိနိုင်တဲ့ စိတ်အနေအထား။
- ထင်ရှားသောစိတ်
- - ထင်ရှားတဲ့စိတ်ကို လက်တွေ့သိမြင်ချင်ရင် မိမိရဲ့စိတ်ကို သတိနဲ့ယှဉ်ပြီး စောင့်ကြည့်သိမှတ်ကြည့်ပါလို့ တိုက်တွန်းချင် ပါတယ်။ စိတ်တွေရဲ့အလျဉ်၊ စိတ်တွေရဲ့ တစ်ခုပြီးတစ်ခု အဆက်မပြတ် ဖြစ်ပေါ်ချုပ်ပျောက်နေတဲ့သဘော၊ စိတ်ကို စိတ်အသိနဲ့ကြည့်မှ သိမြင်ရတဲ့ စိတ်အနေအထား၊ စိတ်ကိုစောင့်ကြည့်သိမှတ်မှု အားကောင်းလာရင် စိတ်နဲ့ စေတသိက်တွေရဲ့ သဘောသဘာဝကို အမှန်အတိုင်း ထင်ထင်ရှားရှား သိလာတဲ့ စိတ်အဆင့်။
- ထင်ဟပ်သောစိတ်
- - စူးနစ်တဲ့ အလင်းရောင်တစ်ခုဟာ တန်ပြန်မှုအရည်အချင်းရှိတဲ့ မှန်ပေါ်မှာ ကျရောက်ရင် မှန်က တစ်ဆင့် နောက်ထပ် တစ်နေရာမှာ အလင်းရဲ့ထပ်ပွား အလင်းတစ်ခု ထပ်ဆင့် ထင်ဟပ်စေတယ်။ မိမိရဲ့ ရိုးသားသန့်ရှင်း စင်ကြယ်တဲ့ အပြုအမူ အပြောအဆို လှုပ်ရှားမှုတွေကြောင့် တစ်ဘက်သားအတွက် အကျိုးရှိခဲ့ရင် အဲဒီတစ်ဘက်သားက တစ်ဆင့် အခြားအခြားသော လူသားတွေဆီကိုပါ ရိုးသားသန့်ရှင်း စင်ကြယ်မှုတွေ ထပ်ဆင့်ပွား ထင်ဟပ်သွားစေမယ့် စိတ်အနေအထား။