ဓနရှင်စိတ်
- ပစ္စည်းဥစ္စာ ငွေကြေးချမ်းသာတော့ ဂုဏ်မောက်ပြီး လူလူချင်း အထက်စီးက ဆက်ဆံတတ်သူတွေရဲ့ လူတန်းစားခွဲခြားစိတ်။
ဓလေ့ထုံးစံစိတ်
- မြန်မာလူမျိုး၊ ထိုင်းလူမျိုး၊ တရုတ်လူမျိုး၊ ဂျပန်လူမျိုး အများစုဟာ တစ်ဆူတည်းသော ဂေါတမမြတ်စွာဘုရားကို ကိုးကွယ်ကြတဲ့ ဗုဒ္ဓဘာသာဝင်တွေဖြစ်ပေမယ့် သူ့လူမျိုး၊ သူ့ရိုးရာ၊ သူ့ယဉ်ကျေးမှု၊ သူ့ဓလေ့ထုံးတမ်းစဉ်လာနဲ့သူ လူမျိုးအလိုက်၊ နိုင်ငံအလိုက်၊ မိမိ အယူအဆနဲ့ မိမိ၊ ဓလေ့ထုံးစံစိတ်တွေ ရှိနေကြတယ်။
ဓားစာခံစိတ်
- စိတ်ထဲဝင်လာတဲ့အာရုံနဲ့ သိမှတ်နေတဲ့အသိနဲ့ အတွဲလိုက် ချုပ်ပျောက်နေတဲ့သဘောကို အတိအကျ သိအောင် စောင့်ကြည့် သိမှတ်နေတဲ့အချိန်မှာ လိုအပ်တဲ့ အသိနဲ့သတိ စိတ်အစွမ်းကို မရသေးမှန်းသိလို့ သိမှတ်မှုကို ရပ်လိုက်တယ်။ သိမှတ်မှု အားကောင်းလာအောင် အရှိန်ယူတဲ့အနေနဲ့ တခြားသိမှတ်မှု တစ်ခုဆီ အာရုံရွှေ့ပြီး အသုံးချလိုက်တယ်။ ဓားစာခံအဖြစ် ဆွဲယူ အသုံးချလိုက်တဲ့ သိမှတ်မှုက ၀င်လေ ထွက်လေရဲ့ ထိသိပျက်ကို သိမှတ်နေလိုက်တာ အသိအားနဲ့ သတိအားက လိုချင်တဲ့အဆင့် ရောက်လာပြီဆိုရင်တော့ ဓားစာခံအနေနဲ့ ခေါ်ယူသိမှတ်နေတဲ့ ၀င်လေထွက်လေ သိမှတ်စိတ်ကို ပြန်လွှတ်ပေးလိုက်တယ်။ (လိုချင်တဲ့စိတ်အရှိန်ရဖို့ ဓားစာခံအဖြစ် ခဏ အသုံးချလိုက်တဲ့ စိတ်အသိ။)
ဓားပြစိတ်
- အနိုင်ကျင့်လို့ရတဲ့ အရာဝတ္ထုကို ထုတ်ပြခြိမ်းခြောက်ပြီး သူတစ်ပါး ပင်ပင်ပန်းပန်း ရှာဖွေထားတာကို အလွယ်တကူ အနိုင်ကျင့် လုယူသွားတဲ့ သူခိုးအကြီးစားစိတ်။
ဓိဌာန်စိတ်
- ဤမှန်သော သစ္စာစကားကြောင့် စသဖြင့် တစ်စုံတစ်ရာကို တိုင်တည်ပြီး အဓိဌာန်ပြု သစ္စာဆိုတဲ့စိတ်။
ဓာတ်တူနာမ်တူစိတ်
- တစ်အိမ်တည်း တူတူနေထိုင်ကြတဲ့ မိသားစုဝင်အချင်းချင်းတောင် မိမိနဲ့စိတ်တူကိုယ်တူ ညှိလို့ရတဲ့သူအချင်းချင်းသာ ပူးပေါင်းတယ်။ စိတ်ချင်းမတူရင် မိဘနဲ့သားသမီး မရင်းနှီးကြဘူး။ စိတ်ချင်းတူတဲ့သူ၊ အယူအဆတူတဲ့သူတွေရဲ့ စိတ်အမျိုးအစား။
ဓာတ်သိစိတ်
- ရင်းနှီးနေတဲ့သူတစ်ယောက်ရဲ့ စိတ်သဘောထားကို အတွင်းသိ၊ အစဉ်းသိ၊ အကုန်သိနေတဲ့ စိတ်အမျိုးအစား။
ဓမ္မဓိဌာန်ကျသောစိတ်
- စည်းကမ်းနဲ့အညီ လက်ခံနိုင်တဲ့ စိတ်အဆင့်။
ဓမ္မန္တရာယ်စိတ်
- မှားယွင်းတဲ့အယူအဆတွေနဲ့ တရားအစစ်အမှန်တွေကို ဖျက်ဆီးပစ်တော့မယ့် အနေအထားကို ရောက်ရှိနေတဲ့ ကြောက်စရာ အကောင်းဆုံး အန္တရာယ်စိတ်အဆင့်။

Next Chapter »